File photo by blogspot.com

Isumat.com/1:12PM, Marso 24, 2021

Deri masaler an iligal nga pagpahuygo denhi ha amon munisipalidad, patapod han nagmamangulo han Pastrana, Leyte PNP Station.

Hi Major Christopher Pangue, Chief of Police han mao nga bungto, in nagsering nga deri ma-obra ha iya nasasakupan an mga supak han balaud nga ginawi-an labi na an pagdumara han illegal numbers game.

Sumala pa han opisyal, an ira pwersa an makusog nga mabalabag kun mayda man magpu-pruweba pag-operate han iligal nga pagpataya. Partikular nga gintudlok ni Pangue an iligal nga swertres nga ira popoypoyon labi na nga nakakadistroso ini han ekonomiya.

Iginbuyagyag han Police Major nga pira na ka higayon nga nag-iikasurulod an illegal numbers game ha iya Area of Responsibility, pero pirmi liwat ini napapakyas tungod han panlimbasog han kapulisan.

Ma-oobserbaran nga an ayuda pinansyal han PCSO ha mga kablasanon in na-iibanan tungod kay nagtitikaguti an revenue han ahensya tungod han illegal numbers game labi na an iligal swertres, pick 3, pick 2 ngan peryahan ng bayan. Ini man gud nga iligal nga pagpataya in deri nahatag hin revenue ha PCSO. Ini in labot la nga waray gihapon bayad nga buhis ha gobyerno an mga iligalista.

Dako naman an pagpasalamat ni Major Pangue ha mga Pastrananhon kay hira mismo an nagsusumat ha kapulisan kun mayda naghihimo hin mga iligal nga ginawi-an ha ira lugar.

Denhi ha Tacloban, Leyte, ngan Biliran, uusa la an kompaniya nga mayda otorisasyon ngan permiso tikang ha PCSO nga magdumara han Small Town Lottery ug amo ini an Victoria Development and Ventures Corporation (VDVC). An VDVC in naghahatag hin dako nga kantidad ngadto ha PCSO komo kaparte han ayuda ha mga kablasanon.

An VDVC in padayon nga nagpapamulat han hingpit nga aksyon ni PNP Regional Commander BGen Rolando De Jesus basi mawagtang na an illegal numbers game ha aton dapit. #