Maatubang hin kaso nga falsification of public documents, usurpation of authority ngan illegal possession of firearms and ammunition an napulo ka tawo nga nadakop han mga ka pulisan han San Jorge Samar ha usa nga checkpoint hadton byernes han gab-i June 5, 2021. Ini in kahuman maka karawat hin impormasyon an mga kapulisan nga mayda armado nga mga tawo nga sakay hin duha nga pribado nga sarakyan an nakatalaan nga umagi han mao nga bungto.

Gin sumat ni Police Staff Sergeant Jerome Estudillo han San Jorge PNP ha interview han isumat.com nga Nag presentar hin peke nga travel authority ngan mga Identification cards an mga suspetsado durante ha gin dumara nga checkpoint labot la han tulo nga 45 caliber ngan usa nga 9mm pistol ngan mga bala nga nakuha mismo ha poder han upat nga mga suspetsado ha sulod han dara hini nga mga bag.

Unom han mga suspetsado in nag pakilala pa nga mga Army General ngan nagpaka Military uniform nga naka destino ha Trans National Anti Organized Crime Group han Office of the President ha Malacanang subay han ira mga identification cards nga gin pakita ha mga pulis pero ha panginano han mga ka pulisan ha Military Intelligence nahisabutan nga deri tinuod nga an mga suspetsado in konektado ha Armed Forces of the Philippines.

Tikang ha Mindanao an mga suspetsado ngan tikadto ini ha Manila han ma dakop han mga pulis ha San Jorge sakay hin Nissan Patrol ngan Innova nga mga sarakyan. An mga suspetsado in detenindo yana ha detention faciiity han munisipyo.