(Photo CTTO)

Isumat.com/ Disyembre 1, 2022

Ginkoronahan nga Miss CosmoWorld 2022 hi Meiji Acualana Cruz, an pambato han Pilipinas dida han coronation night kagab-i, Nobyembre 30, 2022 ha The St Regis Center, Kuala Lumpur, Malaysia.

Hi Cruz, nga an nanay in taga Oras, Eastern Samar amo an napili han hurado han sobra 20 nga contestants tikang ha magkalainlain nga nasud.

An taga Uzbekistan ngahi Amaliya Shakirova an 1st runner-up, samtang an 2nd runner-up amo hi Miss Onnapun Chiangmai. An iba pa nga kaapi han Top 5 amo hira Miss Indonesia Zara Amalina ngan Miss Zambia Cecilia Kongwa.

An 28-anyos nga hi Meiji in nagin 2nd Runner-Up han Bb Pilipinas 2021. Hapagkayana hiya in TV Host ngan brand ambassador. Tulo na nga kurso ha kolehiyo an iya natapos, ngan nag-eeskwela yana hin Masters Degree.

Hi Meiji in makusog nga nagduduso han maupay nga edukasyon. Para ha iya, an edukasyon in naghahatag hin kapas basi magin produktibo an katawhan.

An Miss CosmoWorld in kompetisyon nga nakabase ha Malaysia ug an premyo han nagdaog in 100 Thousand US Dollars. Panuyo hini nga organisasyon an pagpili han kababayen-an nga indipendiente, dako an pag-ugop ha kinabuhi ngan dako an potensyal nga magin lider.

Miss CosmoWolrd 2022 Meiji Aculana Cruz ug iya nanay, Mylene Aculana Cruz.

Iton nanay ni Meiji, hi Mylene Aculana Cruz in taga Oras, Eastern Samar. Dida han kapatronan han bungto hadin Oktubre 2022, hi Meiji in bumsita ngadto ha Oras hin pira ka adlaw kun diin nagserbe hiya nga huwes han Miss Lovely Oras Pageant ngan umapi hiya han parada ngan iba pa nga aktibidadis.

Hiya in gin-estimar ngan mapaso nga ginkarawat han iya igkasi mga Orasnon ha panguna ni Mayor Roy Ador ug mga ka-urupdan. #