(File photo by rappler)

Isumat.com/7:54AM, May 26, 2020

Bakasyon-grande gud yana an usa nga maestro kay labot la nga Agosto pa an pagbalik han eskwela, maatubang pa gud hiya hin kaso ngan namimintana an hilawig nga kapresuhan kun mapamatud-an an iya kasaypanan kasumpay han iligal nga droga.

Hi Bryan Sevilla, alias Brix, 39 anyos ngan maestro ha Northern samar in na-aresto han kapulisan dida han buy-bust operation ha Brgy Jubasan, Allen, Northern Samar.

Subay han report han Allen Municipal Police Station, hi Sevilla in lakip dida han high value target nga mga drug personalities han bungto. Dida han nakalabay nga adlaw, gindumara an buy-bust operation ngan usa nga pulis an nagin posuer-buyer. Waray makasabot an suspetsado nga pulis an iya ka-transaksyon sanglit ginkwelyuhan dayon hiya.

Duha ka sachet hin gintotoohan nga shabu an nakumpiskar tikang kan Sevilla nga residente han Brgy Kinabranan han nasabi nga bungto.

An suspetsado in detenido na yana ha lock-up facility han police station ngan nakatalaan umatubang han kaso mahitungod han pagdaradara ngan pagbaligya hin iligal nga droga. # (KEVIN SIOSANA)