Isumat.com/7:20AM, October 2, 2020

Madedelatar hin usa ka semana an pagtikang han klase ha Hilongos National Vocational School ha Hilongos, Leyte tungod kay nagpositibo han Covid-19 an usa nga maestra han nasabi nga eskwelahan.

Nagpahayag an DepEd Leyte Division, an HNVS in mag-aabri han klase hiton Uktubre 12, ngan deri igkakadungan han Oktubre 5 nga pagtikang han klase han mga pampubliko nga eskwelahan ha bug-os nga nasud.

An panhatag han Modules ngadto han mga estudyante han HNVS in aadto na gihapon bubuhaton hiton Uktubre 12. Ini in agud maseguro nga waray matatapnan nga iba nga personales han eskwelahan ngan mga estudyante.

Kakulop, 17 nga mga taga Hilongos an nagkatatapnan han virus. Gintotoohan nga local transmission an hinungdan han katapni ha ira. 57 na an natapnan dida han bungto ngan 28 an naka-recover. Mayda pa sobra 368 Persons Under Monitoring dida han munisipalidad.

An LGU-Hilongos in nagdudumara yana hin hingpit nga contact tracing basi matudlok an iba pa nga posible iginka-urusa han mga nagkatatapnan. #