Isumat.com/Hunyo23, 2022
Nagpapadayon an bayolente nga mga panhitabo ha syudad han Calbayog.
Kakulop, Hunyo 22, 2022, namatay in usa nga lalaki han pagpusilon hiya ha Purok 6, Brgy Dagum han nasabi nga syudad.
An mga residente han nasabi nga lugar in nagkilala han biktima nga hi Florentino Anollado alyas Tinoy nga nag-uukoy ha Brgy Aguit-itan.
Sumala hin pira nga nagpakakita, ginlanat an biktima han suspetsado ngan samtang nagmamalahimo pakatalwas an biktima, naigo hiya hin bala. Kadagmitan naman nga kumalagiw an gintatahapan katapos han insidente.
Iginsumat gihapon hin pira nga saksi nga an biktima in kilalado nga lider hin pasaway nga grupo hin menor de edad didto han ira lugar.
An Calbayog City PNP in padayon nag=iimbestigar han panhitabo.
Han nag-agi nga semana, ginpatay didto ha Calbayog an mag-oyab nga hira Jade Bestudio ngan Jeallen Lamparas ngan gintotoohan nga ginlugos pa an babaye antis patayon.
Aada na yana ha kustudoya han mga otoridad an tulo nga suspetsado hini nga insidente ngan ginsampaan na hin mga reklamo ha piskaliya. #
