Babawi-on han Tacloban City Government an mga housing units nga pag uukyan unta han mga nadarihagan han super typhoon Yolanda.

Sumala kan Ted Jopson, Officer in Charge han Tacloban City Housing Office, kinyentos ka units hin pabahay an kukuha-on han syudad tikang han mga beneficiaries. Pahayag pa ni Jopson nga syahan pa la in inga batch hin mga pabahay kay mayda pa masunod nga hugna hin panmawi han units.

ya iginrason nga an mga natudlok nga ma-ukoy unta hini nga mga pabahay amo in waray man ngani mag-ukoy o bisan sumiplat naman la han mga balay nga gintukod para ha ira han National Housing Authority komo relokasyon han mahideklarar nga an ira mga puy-anan in nahilakip ha mga danger zones.

Labot la han waray umukoy, nagsering hi Jopson nga an iba in ginhimo na ini nga negosyo pinaagi hin pagpa plete o ginhimo nga boarding house. Imbes nga para unta ini han mga Taclobanon nga nadarigan ni Yolanda, taga iba na nga lugar an nag uukoy kay hira naman an nag renta. Kasumpay hini, gin-aghat ni Jopson an mga nagdesisyon nga diri maukoy ha mga pabahay nga boluntaryo igtubyan ha City Government an unit basi diri hira ma blacklisted ngan diri na magtikadako pa an problema.

Iginpasabot naman han City Housing Office nga sobra pa hin usa ka yukot nga housing units an ira babawi-on ha masunod nga mga panahon. An mga mababawi nga units an ighahatag liwat ngadto han mga intresado nga mga Taclobanon. Kun aton manunumduman, pira nga mga benefisyaryo han pabahay in nag aarungot nga kulang hin facilidad an mga relocation sites sugad han tubig ngan kuryente, pero nagdig-on hi Jopson nga an gobyerno in nakagtuman na hini ug an iba nga mga kakulangan in gintatrabaho na yana. An iba liwat in nagrason nga harayo an ira pagpakabuhi tikang ha mga relocation areas amo nga waray nala hira umukoy didto.