Isumat.com/9:31AM, Abril 7, 2021
Porlomenos 16 nga Health Personnel tikang ha Rehiyon Otso an nagbaton han panawagan nga boluntaryo magserbe han mga pasyente han Covid-19 ha magkalainlain nga hospital ha Metro Manila ngan upat nga probinsya .
Sumala han report, 15 nga nurses ngan usa nga doktor ha Sinirangan Bisayas an nakatalaan paglakat ngadto han nasabi nga mga lugar kun diin padayon an paghinataas han kaso han Covid ngan naghihimakuri na pagtimangno an mga hospital tungod han kadamo han pasyente.
Hadin nag-agi nga adlaw, nanawagan an gobyerno ha mga medical workers ha bug-os nga Visayas para kumadto ha Manila.
Didto ha Cebu, maabot hin usa ka gatos an nag-apply ngan malakat yana nga adlaw ngadto ha Metro Manila.
An mga doktor in mayda sweldo nga 60 Mil samtang an mga nurses in makarawat hin 33 Mil pesos labot la han 5 mil pesos nga allowance kada bulan.
Libra gihapon an ira pag-ukoy ngan transportasyon didto ha Manila. #
