Isumat.com/Agosto 30, 2021
Duha nga estudyante ngan usa nga empleyado ha gobyerno an naawat an kinabuhi dida hin magkalain nga aksidente ha kadalanan ha Kananga, Leyte ngan Naval, Biliran hadin nag-agi nga pira ka adlaw.
Hadton Agosto 28, 2021, nagbunggo-ay in usa nga motorsiklo ngan 6-wheeler truck ha national highway ha Brgy Tugbong, Kananga kun diin namatay hira Joseph Sanchez, 22 anyos ngan graduating student ha Visayas State University, Baybay City; ug an iya patod nga Grade 8 student, 15 anyos. Hira in mga residente han Brgy Tagaytay han mao nga bungto.
Dida han imbestigasyon, hi Sanchez an nagmamaneho han motor ug angkas niya an iya patod ngan tikadto unta hira ha poblacion han bungto. Pag-abot han eskina tisulod na unta ha Kananga, nag-ensima an motorsiklo hin usa nga sarakyan ngan kumabat ngadto han kaluyo nga linya.
Tiempo liwat nga nagsusulsog an truck didto han kaluyo nga linya ngan nagsampakay ini ngan han motorsiklo. Tungod han pwersa han bunggo-ay, nahilabog an motor upod an mga sakay hini. Nag-antos hin grabe nga karamtan ha lawas an duha nga sakay hinungdan han ira kamatay.
An drayber han truck nga ginkilala nga hi Felix Yoldan Jr, 28 anyos, in waray manginano han natabo ngan nagderetso la. Dida han iya pag-asoy, waray hiya umukoy tungod han iya kahadlok nga pagkastiguhon hiya han katawhan.
Nagdesisyon hiya nga dumeretso la anay ha Palompon. Kataliwan hini, sumakay hiya hin pribado nga behikulo tikadto ha Ormoc City ngan didto na hiya sumurender ha mga otoridad.
Samtang, hadton pasado alas 8 han gab-i, Agosto 27, nagbanggaay in duha nga motorsiklo ha Brgy Larrazabal, Naval, Biliran kun diin namatay an DPWH Job Order Employee nga hi Cesar Japay, 62-anyos, inasaw-an ngan residente han Brgy Calumpang han nasabi nga bungto.
Hi Japay in angkas han motorsiklo nga ginmamaneho-an ni Randel Polinar nga nagtatrabaho gihapon ha DPWH Biliran District ngan residente han Brgy Villa Consuelo.
An drayber han motor nga iginkabanggaay amo hi Patrolman Rey Lopera, 36 anyos, nakadestino ha PNP-CIDG Biliran, ngan taga Brgy Talustusan.
Nagawas ha imbestigasyon nga an motorsiklo nira Japay ngan Polinar in sumimang ngadto han linya han ira iginkakatapo nga motorsiko rason nga nagbanggaay hira.
An pulis ug hi Polinar in nagkaada hin karamtan ha lawas ngan gintambal ha hospital, samtang hi Japay in tumalikod ha kadayunan samtang ginpapaningkamutan nga matalwas pa unta hiya. #
