Isumat.com/5:15AM, June 14, 2020

Naghangyo hi Gobernador Ben Evardone ha mga taga Eastern Samar nga na-stranded didto ha Metro Manila ngan iba pa nga lugar nga deri la anay magkabalik ngadto han probinsya.

Ginhimo ini ni Evardone nga panawagan pira ka oras an naglabay katapos mahipatik an syahan nga kaso han COVID-19 ha Eastern Samar ngan nahirecord han DOH nga 200 na katawo an natapnan han virus ha bug-os nga Region 8. An syahan nga Positive Case ha Eastern Samar in usa nga OFW nga taga bungto han Mercedes nga umuli tikang ha Singapore, pero na-stranded hin sobra usa ka bulan ha Cebu.

Ginklaro han gobernador nga na-iintindihan niya an makuri nga kahimtang han iya igkasi-Estehanon ha iba nga lugar, pero nanginyupo hiya nga kun mahihimo la deri la anay hira umuli ha probinsya kay posible magdurot la ini hin dako nga problema.

Partikular nga gintudlok ni Evardone an mga mulopyo nga nagpapakyaw hin mga sarakyan ug an iba nga nakikisakay hin mga delivery trucks. Sering pa niya, delikado ini nga pamaagi kay deri kilalado an mga iginkakasakay han pagbiyahe nga posible nagdadara han kagaw.

Nagsering pa an amay han probinsya nga pira na nga insidente kun diin damo an nagkakatatapnan han mga magkasarakay dida han pagbiyahe pinaagi hin barko ngan ginpakyaw nga mga vans.

Kun deri gud mahihimo ngan desidido na gud nga umuli, nagsering hi Evardone nga kinahanglan makigsumpayan anay ha Provincial o National Government basi waray mga aberiya dida han pagbiyahe.

Kadungan hini, gin-awhag niya an mga Estehanon nga tumanon an iginpapasunod nga health protocols ngan mag-ampo ha Makagarahom basi deri na magsarang an virus.

Samtang, iginpasabot naman han Parokya han Singbahan Katoliko ha Mercedes nga temporaryo deri la anay magdudumara hin misa nga tatambungan han publiko.

Nagsering an kura paroko nga samtang ginsesegurado pa han LGU ngan health officials an contact tracing, waray la anay pampubliko nga misa, pero magdudumara la gihapon han misa kun diin an padi la ngan sakristan an aadto ha sulod han singbahan. # (KEVIN SIOSANA).