Isumat.com/9:14AM, Pebrero 19, 2021
Dako pa hin duro an kulang han gintatarget nga mga bag-o nga manmurutos han Commission on Elections denhi ha Sinirangan Bisayas.
Ha interview kan COMELEC Regional Director Jose Nick Mendros ha iFM-RMN Tacloban, iya iginbuyagyag nga ika-upat pala ka parte o 25% han ira target an nagpalista ha ira buhatan. Sumala kan Mendros, porlomenos 200 Mil nga bag-o nga botante ngan Re-activating voters an ira gintatarget.
Utro nga nanawagan an opisyal ngadto han natutungdan nga katawhan nga magparehistro na ngan deri na maghulat han deadline ha Setyembre 30, 2021. Igindig-on niya nga waray na extension ah deadline. Boot-sidngon sobra nala hin pito ka bulan an panahon para makagrehistro ha COMELEC.
An tinatawag nga New voters amo an waray pa makagrehistro bisan kakan-o ngan porlomenos 18-anyos an edad antis o dida han Mayo 9, 2022 nga amo an adlaw han pinili-ay. An mga Re-activating Voters amo an mga botante nga waray makabutos han nag-agi nga sagunson nga duha nga election.
Makikigsumpayan an COMELEC ha mga Local Government Units han rehiyon basi makagdumara hin barangay sattellite registration.
Ginpahilawig na gihapon han ahensya an adlaw ngan oras han panrehistro kay tinikangan Pebrero 21, tikang Martes tobtob Sabado, alas 8 han aga tobtob alas 5 han kulop, puede makagpalista. Kun igkatuman nga Pista Opisyal an adlaw, abri gihapon an opisina han panrehistro.
Hiton Mayo 9, 2022, an Pilipinas in magpipili hin bag-o nga presidente, bise-presidente, 12 nga senador, mga congresista, gobernador, mayor ngan mga kaapi han sanguniang panlalawigan ngan sanguniang bayan. #
