Isumat.com/Hunyo 21, 2021
Ha atubangan han ginpahuruhugot nga pagnbantay han seguridad ngan panawagan nga maundang na an bayolente nga panhitabo ha Calbayog City, duha ka tawo an pinanmatay dida han pag-ikatarapos han semana didto han mao nga syudad.
Dida han pasado alas 6 han gab-i, Hunyo 19, an nangungulo han Land Titling Division han Calbayog City Assesor’s Office, Engr Salvador Biliran an ginpanmumusil hin waray panhikilal-i nga mga suspetsado harani han elementary school ha Brgy Matobato.
Ha inisyal nga imbestigasyon, hi Biliran in pumalit anay hin pasayan ngan han tisakay na hiya han iya Nissan Pick-Up, gindaop hiya han mga gintatahapan ngan ginpusil. Kadagmitan kumalagiw an mga suspetsado sakay hin motorsiklo.
An 59-anyos nga biktima in dayon gindara ha hospital pero gindeklarar han doktor nga dead on arrival.
Upod ni Biliran dida han sarakyan an iya misis ngan apo pero hira in waray mag-antos hin karamtan ha lawas dida han insidente.
Kataliwan hini nga insidente, waray pa ngani humagos an 24-oras, mayda na liwat pinatay pinaagi hin pagpusil ha Diversion Road, Brgy Bagacay.
Pasado alas 2 han kulop, Hunyo 20, han patayon an biktima ginkilala nga hi Sam Castil.
Subay han impormasyon, sakay gihapon hin motorsiklo an nag-uusaan nga gunman.
An duha nga panhitabo in padayon gin-iimbestigar han mga otoridad basi matudlok an motibo ug an mga nagpapaluyo han krimen. #
