(Photo by WordPress.com)

Isumat.com/7:51AM, Enero 6, 2021

Barangay Kapitan ha San Miguel, Leyte nga gintotoohan miembro han Espinosa Drug Group an nasikmit han mga otoridad dida han buy-bust operation hadin Enero 4 ha Brgy Libtong han nasabi nga bungto.

An mga operatiba han PNP Leyte Anti-Drug Unit ngan San Miguel PNP ha koordinasyon han PDEA an naka-aresto han suspetsado ginkilala nga hi Marcial Lacabe, 49 anyos ngan Kapitan han Brgy Cayare. Hiya in ginkokonsiderar nga High Value Target ngan nasasalin pa nga miembro han sindikato han droga ni Kerwin Espinosa.

An mga tinubyanan han balaud an nagdumara han operasyon pasado alas 4 han kulop kun diin nakapalit hira hin usa ka sachet hin gintotoohan nga shabu tikang kan Lacabe. Han ma-aresto an suspetsado, nakakumpiskar pa an kapulisan hin kadugangan nga walo ka sachet han iligal nga droga. Nagpahayag an mga otoridad nga balor 30 Mil pesos an droga nga nakuha tikang han suspetsado.

Hi Lacabe in nakadetener yana ha San Miguel PNP ngan nakatalaan umatubang han mga kaso nga iginsampa kontra ha iya. #