(File photo by Gov)

Isumat.com/7:38AM, Pebrero 9, 2021

An syudad han Ormoc an matutudlok nga nagpatuman han pinakamahugot nga pag-istrikto ha pagpasulod ngan pagpagawas han katawhan ha ira lugar tikang han pagbutho han Covid-19 Pandemic.

Pero tungod han pagpatukdaw han naharusdak nga ekonomiya ngan iba pa nga rason, nagdesisyon an Ormoc, upod na an paghagrani nga mga bungto nga nasasakop han 4th District han Leyte (Albuera, Kananga, Matag-ob, Isabel, Merida ngan Palompon) nga pahukalon an pag-istrikto ha gi-os han publiko ha mga borders han ira tagsatagsa nga lugar.

Nagka-iristorya an mga alkalde han nasabi nga mga LGUs ngan nagka-urusa hira nga pahukalan an restrictions ha border controls. Ini in agud mapakurukusog an ekonomiya, mabuligan an mga empleyado han gobyerno nga deri kuri-an ha ira mga trabaho, ngan magin masayon la an pagpalit han panguna nga mga panginahanglan han publiko.

Dida han report han Ormoc News and Updates, iginpahayag nga an mga Authorized Persons Outside Residence (APOR) in deri na malalangan ha checkpoints hini nga mga lugar kay waray na interview, an importante mayda la hira Border Pass ngan QR Codes.

Igindugang pa han report nga an mga empleyado han Ormoc ug han unom nga bungto in puede sumulod-gumawas han nasabi nga mga LGUs basta mayda la nira LGU Identification Card ngan QR Code.

Iginproponer naman ni Ormoc Vice Mayor Toto Locsin nga tugutan an mga Ormocanon nga makasulod ha mga bungto ha 4th District bisan waray Health Certificate basta makakagpakita la hin ID nga taga Ormoc an nasabi nga biyahedor.

Gingklaro naman han mga LGU-Ormoc nga bisan kun deri na sugad ka istrikto an mga patakaran ha border, magpapabilin nga kinahanglan an QR Code ha bisan hin-o nga masulod han syudad, taga Ormoc man o taga iba nga lugar.

Matuod, ini nga mga ginkasarabutan in puede magbag-o ha bisan ano nga oras depende han kadamoon han Covid Cases ha Ormoc ug han mao nga mga bungto ha 4th District.

Dida han report han Ormoc City Health Office, mayda sobra 40 an aktibo nga kaso han syudad tobtob han Pebrero 8, 2021. #