Isumat.com/7:21AM, September 14, 2020

Iginmando han Ombudsman an unom ka bulan nga suspensyon hin 89 nga mga opisyales han barangay ha bug-os nga Pilipinas kun diin lakip denhi an pito nga barangay kapitan ha Sinirangan Bisayas tungod han reklamo nga nanlisbot hira ha panhatag han ayuda pinansyal han Social Amelioration Program (SAP).

An mga punong-barangay ha Region 8 nga suspendido amo hira Michael Vapor han Jordan, Villaba, Leyte; Esterlina Jacobe han Nasaug, Maasin City; Jenecita Losaria han Catalina, Jiabong, Samar; Efren Truelda han Brgy 13, Catbalogan City; Wilfredo Bacarra han Masagana, Jiabong, Samar; Nathan Gabronino han Zone 3, Sogod, Southern Leyte; ngan Jebanie Rios han Buenavista, Palompon, Leyte.

Ini nga kamanduan han Ombudsman an iginpatamak han pormal nga reklamo nga iginsalawad han DILG kun diin gin-aakusaran an nasabi nga mga kapitan hin iregularidad ngan anomaliya ha pagdistribuer han cash assistance durante han panhatag han 1st Tranche han SAP pira na ka bulan an nakalabay.

Ini nga ayuda pinansyal an ginbukalsan han gobyerno basi makabulig han kablas nga mga pamilya sugad man an nagkawawarayan hin pakabuhi epekto han COVID-19 Pandemic.

Hi DILG Secratary Eduardo Ano an nagsugo han mga natutungdan nga Municipal Mayors nga deretso ig-implementar an suspension order ha takna makarawat nira an mga dokumento tikang ha DILG.

Kasumpay hini, nagpasalamat hi Ano ha Ombudsman tungod han madagmit nga aksyon han ahensya kontra han nadadabi nga mga opisyales han barangay. Nagsering hi Ano nga unta magin leksyon ini ha bisan hin-o nga opisyal nga deri mag-aalang an gobyerno pagpataw han kaangayan nga patok ngadto han mga indibiduwal nga nagbubuhat hin linurong.

Dida han kamanduan han Ombudsman, nagsering an ahensya nga makusog an ebidensya han DILG kontra han nasabi nga mga opisyales. Ini nga mga reklamo in naglalakip han Grave Misconduct, Serious Dishonesty, Abuse of Authority, Conduct Prejudicial in the Best Interest of the Service. Iginpahayag pa han Umbudsman nga posible magin dalan ini nga mapatalsik ha pwesto an nasabi nga mga opisyal han barangay.

Labot la han nasabi nga barangay kapitanes, an PNP-CIDG in nagsalawad gihapon hin mga kaso ha korte kontra hin sobra 300 katawo nga naghimo gihapon hin tinuyaw ha panhatag han SAP. Upod hini nga mga ginkasuhan an mga appointed barangay officials ngan an ira kakuntsaba nga mga sibilyan.