Isumat.com/7:20AM,June 30,2020
Nagsarit nga magmumulay la ha gawas han balay, pero nangarigos ngay-an ha salog ngan didto hira iginkahibalag han ira kamatayon.
Duha nga menor de edad an binawi-an han kinabuhi han magkalulumos hira samtang nangangarigos ha salog ha Brgy Utanan, Hilongos, Leyte. Subay han imbestigasyon han Hilongos Municipal PNP Office, an usa nga biktima in nagsarit han iya kag-anak nga magawas han balay basi makigmulay han iya sangkay.
Pero imbes nga magmulay la harani han balay, pumakadto ha salog an duha nga kabataan ngan nangarigos. Nadisgrasya hin kalumos an duha nga biktima samtang nangangarigos.
Napa-usa an mga kag-anak han mga biktima nga maiha na nga waray babalik an ira mga anak, sanglit iginreport ha kapulisan nga nawawara an kabataan. Mayda nakagsumat nga nangarigos ha salog an duha. Naningkamot nga matalwas han mga rescuers an duha nga kabataan pero igindeklarar hira nga dead on arrival pag-abot ha hospital.
Waray igpagawas han Hilongos PNP an mga ngaran han duha nga biktima. # (KEVIN SIOSANA)
