Isumat.com/Nobyembre 4, 2021
Tulo ka tawo an binawi-an hin kinabuhi ha magkalain nga trahedya ha Leyte ngan Tacloban samtang gintitigamnan han bug-os nga nasud an “Kalag-kalag” o Undas.
Ha Bato, Leyte, an magbugto nga hira Roberto Baron, 25 anyos; ngan Gerald Baron, 12 anyos, in disgrasya nga nagkalulumos samtang nangunguha hin utanon nga pako ha pangpang hin usa nga salog ha Brgy Amagos han nasabi nga bungto.
Dida han report han Bato PNP Station, pasado alas 10 han aga hadton Nobyembre 1, an mga biktima in lumakat ha ira balay ha Brgy Alegria basi manguha hin utanon. Hadto nga panahon, makusog an agos han salog tungod han pira na ka adlaw nga pag-inuuran.
Gintotoohan han mga imbestigador nga nadara han pwersa han tubig an magbugto hinungdan han ira kalumos. Usa pa ka adlaw an nakalabay han matad-an han Search and Rescue Team an patay nga lawas han magbugto nga Baron.
Samtang, ha Tacloban City, nalumos in usa nga 9 anyos nga babayehay ha usa nga beach resort ha San Jose District han syudad.
Dida han inisyal nga imbestigasyon, an pamilya han biktima nga taga Norte nga dapit han syudad in pumakadto ha Blue Paradise Resort basi mangarigos hadton Nobyembre 2, pasado alas 8 han aga. Samtang nagkakarisyo ngan sagipo an mga kag-anak ha pag-andam han ira pagkaon, waray nakatimangno han bata ngan gintotoohan nga kumarigo dayon ha dagat.
Pira ka minutos an nakalabay, gin-iliw na an biktima. Kasering han pamilya nga waray ini kumarigos ngan namasyada la didto han kabaybayunan. Ira ginpanmiling an bata pero napakyas hira, sanglit nagdesisyon nga igreport ha San Jose Police Station.
Pasado alas 9 han gab-i han mayda magpasabot ngadto han kapulisan nga mayda bata nga iginsampig ngadto han baybayon. Kadagmitan gindara an biktima ha Leyte Provincial Hospital pero igindeklarar han mga doktor nga dead on arrival. #
