Isumat.com/8:10AM, July 14, 2020
Usa nga taho vendor an na-aresto dara hin iligal nga droga samtang usa liwat nga preso nga may kaso nga murder an naka-ikyas ha karsel dida hin magkalain nga panhitabo.
Hi Randy Dominguez, parabaligya hin taho, ngan residente ha Sogod, Southern Leyte an na-aresto han mga operatiba han PDEA ha buy-bust operation. Napalit tikang ha iya in unom ka sachet hin gin-aalegar nga shabu nagkakantidad hin 6 mil pesos.
Hinsabutan nga hi Dominguez in sumurender na hanhadi pero bumalik hiya ha pagbaligya han iligal nga droga.
Samtang didto naman ha Northern Samar, naka-eskapo tikang ha Provincial Jail ha bungto han Bobon hi Rosendo Fernandez, 28 anyos, may-asawa ngan residente han Brgy Balatbalud.
Hiya in may kaso nga pagpatay. Gintotoohan nga naka-eskapo hiya ha tabis na han kagab-ihon hadton Sabado. Dida han inisyal nga imbestigasyon, didto lumusot han guba nga alkoba an preso ngan nakagawas ha compound han Provincial Jail.
Ginhahalpat na yana han mga otoridad ini nga preso nga naka-eskapo. #
