Naghatag hin kasayuran an Provincial Health Office han Eastern Samar mahitungod han rason han kamatay hin usa nga indibiduwal ha Borongan City nga gintudlok nga suspect COVID-19 case.
Subay han opisyal nga pahayag han ahensya, an hinungdan han kamatay han nasabi nga pasyente in Severe Asthma o hika. Ini nga tawo in senior citizen ngan pira na ka beses nga na-confine ha hospital dara hini nga iya sakit.
Ini nga pasyente in ginkonsiderar nga Suspect COVID 19 case dara kay senior citizen na hiya ngan makuri an pag ginhawa, ngan bisan kun hika an iya sakit nahi-upod hiya han Suspect COVID case dara han bag-o nga klasipikasyon nga igin-implementar han Department of Health.
Ini nga tawo in waray gihapon pagbyahe ngadto hin iba nga lugar, ugaring mayda niya kaupod ha balay nga tikang ha Luzon nga hadto pa han Pebrero bumalik ha Borongan ngan waray man hini iginpakita nga mga sintomas han corona virus. Iginpahayag pa han Provincial Health Office nga nakuhaan hin swab sample ini nga tawo ngan ginhuhulat pa an resulta han confirmatory test.
Dara nga hika man an kawsa han kamatay han pasyente, an mga health workers nga nag-asikaso ha iya ha hospital in waray na igpa-ilarum hin kwarentina pero ginsagdunan nga obserbaran an ira panlawas ug an ira temperatura.
Kasumpay hini, ginseguro han opisina nga ini nga ira pasamwak in iginpatamak ha masusi nga imbestigasyon han PHO sugad man han Borongan City Government. Kun may mga notisya nga deri nasusubay o tarihas hini nga pahayag, makokonsiderar ito nga fake news, pahayag pa han ahensya.
Kakulop nga adlaw, nagsarang an hurobhurob ha Eastern Samar nga mayda daw COVID positive ha Borongan nga tumalikod hin kadayunan nga nagresulta han pagkabaraka hin damo nga mga mulopyo. An Provincial Health Office an nagpagawas han official statement basi maklaro ini nga isyu alas 10 an takna kagab-i, Abril 14, 2020. #
(Posted 3:30 AM, April 15, 2020)
