Isumat.com/8:10AM, November 12, 2020
Waray pa iginpagawas nga resolusyon an Tacloban City Prosecutors Office mahitungod han reklamo nga Sexual Harassment o pakatalapas han mga probisyon han Republika Acta 7877 kontra kan Department of Labor Regional Director Yayah Centi.
Ini an nasabutan han pagpaki-ana han iFM-RMN Tacloban han nasabi nga buhatan kakulop, Nobyembre 11, 2020. Sumala han usa nga empleyado han City Prosecutors Office, hadton Oktubre 8 pa iginsalawad an nasabi nga reklamo.
An mao nga reklamo in aadto na yana ha usa nga fiscal, ngan gintitirutimbang pa kun ano an magigin resolosyon. Aada ha mga kamot ha piskaliya kun igsasampa ini ha korte o igdi-dismiss, depende han mga argumento nga igpapahayag han magkaluyo nga panig.
An surok han impormasyon in waray na maghatag hin kadugangan nga detalye kay deri hiya otorisado pagsumat ha publiko o ha media kasumpay han mga impormasyon hini nga insidente.
Hinsabutan han Isumat.com nga an tagreklamo in 23-anyos nga empleyada han DOLE-Region 8.
An iFM-RMN Tacloban in naningkamot pagtawag kan Centi pero pirmi busy an linya han iya telepono. Mayda impormasyon nga pira na ka semana nga waray mag-report ha ira opisina hi Centi. Waray liwat masabti kun official travel o naka official leave of absence an director.
Hi Centi an lumingkod komo mangulo han nasabi nga buhatan hadton 2018. #
