Isumat.com/8:30AM, July 17,2020

Bisan kun waray makatapo han target, iginkalipay han Department of Education-Region 8 an hitaas nga numero han nagpa-rehistro nga mga estudyante tikang ha pre-school, elementarya ngan high school.

Kakulop, Hulyo 15, an katapusan nga adlaw han pagpa-enroll ha pampubliko nga eskwelahan, igin-anunsyo han DepEd Regional Office nga umabot hin 83 porsyento an nagparehistro.

Dida han 1.3 Million nga gintatarget, maabot hin 1,087,000 an nagpa-rehistro. Ini nga numero ha Eastern Visayas amo an gihahata-asi ha ngatanan nga rehiyon han nasud. Ha bug-os nga Pilipinas, umabot ha 73 porsyento an enrollment rate.

Ginklaro naman han DepEd, nga bisan kun tapos na an enrollment period, kakarawaton la gihapon an mga atrasado nga magpapalista antis an pag-abri han klase hiton Agosto 24.

Ginseguro naman han ahensya nga ginhihimo nira yana an mga pamaagi basi makagdumara han klase ngan makagpa-angbit hin kina-adman ha atubangan han pandemya han COVID-19.

Ha luyo nga bahin, an Leyte National High School ha Tacloban City in naglapos han target. 9 Mil la an ira ginlalauman nga magpapa-rehistro pero umabot nah in sobra 10 Mil an nagpalista. Pero iginpatapod han LNHS nga kumpleto an ira facilidadis para han mga estudyante.

An enrollment period in tobtob la unta han Hunyo 30, pero ginpahilawig pa hin duha ka semana tungod han habubo nga ihap han nagpalista.

An iba nga kag-anak in nagpabati hin kabaraka nga matapnan an ira mga anak han corona virus ha eskwelahan sanglit nag-alang pagpa-enroll. #