Isumat.com/Oktubre 25, 2021

Nahipaslak ha selda in usa nga kaapi han Philippine National Police ha Eastern Samar tungod han reklamo hin panarhog ngan panutok hin pusil hadin nakalabay nga adlaw.

Dida han report han PNP Regional Office, ginkilala an suspetsado nga hi PCpl Alexander Salazar, 43 anyos, residente han Brgy 1, Balangiga, E. Samar, ngan nakadestino yana ha Hernani Police Station.

An tag reklamo in ginkilala naman nga hi Abby Abrogar, nga nag-uukoy gihapon han nasabi nga barangay.

Dida han imbestigasyon, hi Abrogar in pumakadto ha Balangiga PNP Station basi mangaro hin bulig kay ginhulga daw hiya ni Salazar pinaagi han pagtutuki ha iya hin pistola. Igindugang pa han tag reklamo nga nagpabuto pa tipa-igbaw han iya pusil hi Salazar dida han insidente.

Kadagmitan naman nga ginkadto han mga otoridad an suspetsado ha iya panimalay. Dida han ginpapaki-anhan han iya igkasi-pulis hi Salazar, sugad-sugad nga nalilisang ini han panmaton. Gindis-armahan hi Salazar han kapulisan ngan nakuha an iya service firearm nga 9mm Baretta.

An gintatahapan in temporaryo iginpaslak ha karsel samtang iginpapadayon an imbestigasyon. #