Isumat/com/ Hulyo 8, 2021

Iginlubong nga waray pa katatad-i an ulo han biktima nga pinatay hadin nag-agi nga adlaw ha Gandara, Samar.

An biktima in ginkilala nga hi Christopher Wahingon, 32 anyos, para-uma ngan residente han Brgy San Francisco, Gandara. Ini nga basrangay in 6 kilometros tiikang ha poblacion. Nakit-an hiya nga buhi pa hadton kulop han Hulyo 6 ngan tikadto han iya uma.

Waray hiya maka-uli hadto nga adlaw ngan pagkabuwas han aga, nakit-an an iya patay nga lawas sapit hin usa nga salog didto han iya umhanan. Hiya in nag-antos hin mga igo hin bala ngan pinugutan han ulo. Naningkamot an iya mga paryente pamiling han ulo, pero hasta nga natapos nala an otopsiya han lawas, waray ini kabilngi.

Natad-an dida han crime scene in upat nga bala hin armalite rifle.

An kapulisan in naghahalpat na yana hin lima katawo nga posible may kalabutan han krimen. Ini nga lima in nahireport nga pumakadto han barangay han biktima hadto nga kulop han Martes ngan may bitbit nga mga pusil. #