Isumat.com/7:12AM, Marso 4, 2021
Mahugot nga ginkondenar ni Tarangnan, Samar Mayor Arnel Tan an pagpataya hin duha nga Kapitan del Barangay ngan usa nga drayber hin habal-habal didto han nasabi nga bungto.
Pasado alas 8 han aga, Marso 3, 2021, gingamaan hin waray pa hikilal-i nga mga suspetsado an mga biktima nga hira Bonifacio Babon, 63 anyos; Amelita Helbolario ngan Elpedio Babon Jr. Hi Bonifacio amo an kapitan han Barangay Marabut, samtang hi Helbolario an kapitana han Brgy Awang. Hi Elpedio Jr amo an drayber han habal-habal nga sinasakyan han duha nga Punong-Barangay.
Nakatalaan unta nga mag-atender hin miting ha Poblacion Tarangan an duha nga kapitanes. Han tikadto na hira han miting, gin-ambush hira ha kalsada nga sakop han Brgy Balugo. Nag-antos an mga biktima hin damo nga igo hin bala hinungdan han ira kamatay.
Nagpabati han iya kasubo hi Tan kadungan han iya hul-os nga pagpasalamat han serbisyo-publiko nga iginhatag han duha nga barangay officials. Iya pa iginsumat nga an mga otoridad in magbubuhat han ngatanan basi matagan hin hustisya an nasabi nga panhitabo.
Kasumpay hini, nanawagan an alkalde ha iya nasasakupan nga magin alerto kun mayda mga tawo nga tarahapan an gi-os ngan deri kilalado nga nagliliyong-liyong ha ira lugar. Sumala pa ha iya, kinahanglan igreport ini dayon ha mga otoridad basi kabalabgan an sugad hini nga mga krimen ha ti-arabot nga mga panahon. #
