Isumat.com/2:51PM, June 12, 2020
Nanawagan hi Governor Edwin Ongchuan ha iya nasasakupan ha Northern Samar nga an pagtigaman han fiesta in angay naka sentro han relihiyoso nga mga buruhaton ngan deri an enggrande nga selebrasyon.
Gin-aghat ni Ongchuan an mga Nortehanon nga an kapistahan in deri kinahanglan nga magin garboso ngan nagpapanunubra an pagrayhak. An angay lugod himoon, sumala han gobernador, amo an pagtambong han Santos nga Misa. An relihiyoso nga aktibidadis amo an an sentro han kapistahan kun diin pinaagi hini iginpapadangat an pagpasalamat ha Makagarahum ug han patrono nga Santo.
Nagsering an amay han probinsya nga didto ha Cebu ug mga progresibo nga mga lugar, iya na-obserbaran nga deri man garboso an pangandaman han mga residente. Deri sugad ha Norte nga may ante-bisperas, bisperas, kaadlawan ngan tapgas sanglit dako hin duro an gastos han mga nagpapatron. Sering pa han opisyal, kun magigin simple la an pagsa-urog han fiesta, dako an matitirok han mga mulopyo ngan mga bungto ug bangin ini an magin dalan basi makagawas na an Northern Samar ha listahan komo usa han pinakapobre nga 20 nga probinsya han Pilipinas.
Yana nga panahon han krisis ngan pandemya, kadam-an nga mga tawo ha bug-os nga kalibutan an naghihimaroydoy an kabutangan, sanglit angay la nga deri kita magpinarayaw ngan himoon la nga simple an mga selebrasyon, pahayag pa ni Ongchuan.
Ginklaro naman ni Ongchuan nga iya igintutubyan ha pamunuan han Singbahan Katolika an paghatag hin giya ha mga mulopyo han insakto nga ginawi-an ha mga kapistahan.
Pira pala ka adlaw an nakalabay hira Eastern Governor Ben Evardone ngan Tacloban City Mayor Alfred Romualdez in nanawagan gihapon ha ira mga nasasakupan nga deri na himoon nga garboso an pangandaman han fiesta. Kun mag-aandam man hin pagkaon ngan harampang, angay la ini para han pamilya ug apiki nga mga paryente. # (KEVIN SIOSANA)
