Isumat.com/2:09PM, June 8, 2020
“Kukumbidahon ko ikaw dida hit akon inagurasyon komo presidente hit Pilipinas ha tuig 2022.”
Ini daw an nagin imbitasyon ni Senador Manny Pacquiao ngadto han iya anay promoter ngahi Bob Arum. Hi Arum in nagbuyagyag nga ha deri pala maiha, nagka-istorya hira ni Pacquiao mahitungod han posibilidad nga asdangay nira Pacman ngan Terrence Crawford.
Dida han ZOOM Telephone nga ira istorya, nagsumat daw hi Pacquiao ha iya nga makandiato an 8-Division Champion pagka pangulo han Pilipinas hiton 2022, ngan kun magdaog an boksidor dapat presente hi Arum dida han inagurasyon.
Iginsumat ini ni Arum kan Mauricio Sulaiman nga amo an Presidente han Wolrd Boxing Council. Sering pa ni Arum kan Sulaiman nga maabot an panahon nga mayda presidente hin nasud nga makikigbalyu-ay hin yabo ha ring ug ini amo hi Pacquiao.
Dida hiton Mayo 2022, pagdudumaraon an presidential election (kun madayon) ha Pilipinas kun diin magigin 43-anyos na an Fighting Senator. Hadton 2009 hi Pacman in nagin Congressman han Saranggani ngan pagka-2016 nagdaog hiya ka senador.
Bisan kun dako an obligasyon komo senador, hi Pacman in waray la gihapon magretiro ha boxing ngan pirmi nagpapakondisyon komo pangandaman kun magkaada hiya hin asdangay. Ha 25-nga kinabuhi ha boxing, nakadaog hiya hin 62 dida hin 71 nga away. Gindadara yana han boxing legend an WBC welterweight crown.
Hi Arum in deri nayana amo an promoter ni Pacman pero nagkahimangraw hira tungod kay ginkakaptan ni Arum hi Crawford nga amo an hadi han WBO welterweight division. Hi Crawford in may record nga 36 nga daog ngan waray perde.
Hi Arum in nagbabanabana nga kun madayon an Pacman versus Crawford unification bout, ini daw an posible magin katapusan nga laban han senador antis hiya tumutok han gidadaku-i nga ayat han iya kinabuhi nga amo an paglingkod komo presidente han Pilipinas.
Tobtob han ginsusurat ini nga notisya, hi Pacman in waray pa magpabati hin komentaryo hini nga pasamwak ni Arum. # (KEVIN SIOSANA)
han
