Isumat.com/9:01AM, Enero 19, 2021

Istrikto hin duro an Ormoc City ha pagpasulod han katawhan ngadto ha ira syudad tungod han Covid-19, ngan yana an baboy nga tikang ha gawas igindederi gihapon nga maka-entra ngadto ha ira.

Hi Mayor Richard Gomez in nagmando na nga sadhan an ngatanan nga pag-ultan o borders han syudad basi deri makasulod an mga baboy ngan pork products tikang ha Mindanao. Ini an rekomendasyon han City Veterinary Office katapos la nga makumpirmar nga apektado na gihapon han African Swine Flu (ASF) an Abuyog, Leyte. Ini nga rekomendasyon in kadagmitan gin-aprobaran ni Gomez.

Kun manunumduman, antis pa an pagbutho han viral disease ha Abuyog, pira na ini ka bulan nga nakakadarahig ha magkalainlain nga parte ha Mindanao. An Abuyog in porlomenos 100 kilometros an distansya ha Ormoc.

Tungod hini, maabot hin 140 nga kababuyan tikang ha Mindanao an napap-aw yana ha South Border han Ormoc tungod kay deri ginpapa-agi ha syudad an mga trak nga ginkargahan han baboy.

Nagsering an City Veterinarian ngahi Dr. Joseph Cortes nga delikado kun umagi ini ha Ormoc magkakataktak an kagaw ha kalsada ngan posible iglupad ha hangin an kagaw ngan makatapon han kababoyan ha Ormoc.

Sering pa han doktor, an kagaw han ASF in makuri mamatay bisan pa mayda disinfection. Iya pa igindugang nga an virus in nabubuhi pa bisan ha refrigirator ngan bisan processed meat products.

Iginpatapod naman han City Government nga deri magkukulang hin pork supply an syudad kay puede umangkat tikang ha Cebu, Negros ngan Bohol.

Pira pala ka adlaw an nakalabay, iginderi han LGU-Abuyog nga mahigawas o mayda makasulod nga baboy ngadto han ira bungto tungod han ASF. Pira na nga barangay didto han munsipalidad an apektado han ASF.

Kakulop, porlomenos 400 nga baboy an pinanmatay nala ngan iginlubong ha Abuyog tungod kay nagkatatapnan han kagaw ngan agud deri na makatapon pa ha iba. #