Isumat.com/Oktubre 25, 2021
Tungod nga napakyas pag-remit ha Bureau of Internal Revenue (BIR) han obligasyon nga kaburuhisan han bungto hin duha ka tuig, napamatud-an han Sandiganbayan nga nakasala ha kaso nga graft hira San Sebastian, Samar Mayor Arnold Abalos ngan anay Municipal Treasurer Virginia Uy.
Dida han desisyon han hukmanan nga iginsurat ni Associate Justice Bernelito Fernandez, hira Abalos ngan Uy in ginsirutan nga mapreso tikang ha unom ngadto ha walo ka tuig tungod han ira pakasupak han Section 3 han Republika Akta 3019 o Anti-Graft and Corrupt Practices Act.
Labot la han kapresuhan, iginmando gihapon han Sandiganbayan nga deri na tugutan pagkapot hin bisan ano nga posisyon ha gobyerno an duha nga opisyal ha bug-os nira nga kinabuhi.
Subay han desisyon han korte, napamatud-an han prosekusyon nga an kaburuhisan han bungto kantidad hin 1.27 Million Pesos han tuig 2008-2009 in waray kabaydi. Nagawas nga an duha nga akusado in mayda kasaypanan tungod han ira pagpasibaya han pagbayad ha BIR.
Ginklaro pa han korte nga an duha nga opisyal in maaram han ira obligasyon pagbayad labi na kay mayda demand for payment an BIR pero ini in ginpasibay-an la.
Waray tagi hin bug-at han korte an rason ni Abalos nga inosente hiya han kaso tungod kay ‘ministerial’ la an iya trabaho. Waray gihapon kakumbinser an korte han rason ni Uy nga an COA in waray pa makakumpleto han ira audit hadto nga panahon.
Pero, an duha nga opisyal in na-acquit o waray sala ha kaso nga malversation o pagmalgastar hin pondo. Nagsering an Sandiganbayan nga an prosekusyon in waray makaprobar nga an nasabi nga pondo in nawawara. An napamatud-an amo an waray makag-remit, pero an kawara han pondo in waray maprobari, sumala pa han desisyon, sanglit waray baratunon an duha ha kaso nga malversation.
An Sandiganbayan in nagsering pa nga tungod han kapakyas nga magbayad han buhis, nag-antos hin danyos an bungto kay nagbayad pa lugod han interes ngan penalidad hadto nga kabaraydan. Deri unta natatabo ini kun iginbayad ha BIR adto nga salapi ha insakto nga takna, pahayag pa han korte.
Pira na ka tuig an nakalabay, an duha nga opisyal in umatubang gihapon hin kaso ha Ombudsman tungod han gin-aalegar nga deri pag-remit han premiums ngadto ha GSIS.
Hi Abalos in nagsalawad han iya kandidatura komo re-electionist pagka-alkalde han San Sebastian para han pinili-ay sunod nga tuig.
An Sandiganbayan an espesyal nga hukmanan nga gin-establisar han gobyerno nga may-ada hurisdiksyon han mga kaso kriminal ngan kaso sibil kasumpay hin pangurakot ngan iba pa nga kasaypanan nga nahimo han mga opisyal ngan empleyado han gobyerno lakip na an mga korporasyon nga ginkokontrolar ngan ginpapalakat han estado.
Samtang ginsusurat ini nga notisya, an kampo han duha nga opisyal in waray pa maghatag hin reaksyon kasumpay hini nga desisyon han Sandiganbayan nga iginpagawas ha publiko pira pala ka adlaw an nakalabay. Ha ilarum han balaud ha Pilipinas, an hin-o man nga akusado in puede magsampa hin motion for reconsideration o mag-apilar han kaso kun waray pa pinal nga desisyon an Korte Suprema. # (with report from mb.com.ph)
