Isumat.com/8:08AM, Abril 12, 2021

Tungod hin dako nga personal nga deri pagka-asya, nagin balewaray an kamagbugto hin duha nga kalalakin-an tungod kay ginpatay han manghod an iya magurang nga bugto.

Ini in natabo Abril 11, 2021 ha Brgy 10, Lawaan, Eastern Samar kun diin an biktima in ginkilala nga hi Domingo Gamalo, 58, anyos ngan nag-uukoy ha Guiuan, Eastern Samar.

An suspetsado amo an 53-anyos nga manghod han biktima nga hi Cresente Gamalo, nga residente han Lawaan.

Dida han inisyal nga imbestigasyon, pito an samad han biktima ha magkalainlain nga parte han iya lawas, ngan screw driver an gingamit han pagbuno-buno. Gintalinguha nga madara ha hospital hi Domingo pero gindeklarar han doktor nga dead on arrival.

Na-aresto naman han mga otoridad an suspetsado ngan dida han panmaki-ana ha iya, nalutaw nga personal nga dilito an ugat han krimen.

Ha iba naman nga notisya, usa nga menor de edad nga may kaso nga murder an nasikmit han kapulisan han Tacloban City Police Station 2. An suspetsado in 16-anyos nga ginkilala ha alyas Mat ngan residente han V&G Subdivision.

An korte in nagpagawas hin Warrant of Arrest tungod han kaso nga murder nga gin-aatubang han akusado sanglit gindakop hiya han kapulisan. #