Isumat.com/7:34AM, August 11, 2020

Nagkamamatay in duha ka tawo ngan nasamaran in duha pa nga iba dida hin brutal nga panikas ha Brgy Obo-ob, Oquendo District, Calbayog City.

Dida han banda alas 6 han gab-i han nakalabay nga adlaw, porlomenos 12 katawo an tigda nga nagkasulod han tindahan nga gintatag-iyahan han mag-asawa nga hira Jeffrey ngan Ashley Floralde. Nagdeklarar hin hold-up an mga suspetsado ngan ginkuha an salapi dida han tindahan balor hin 40 Mil pesos. Katapos mabitbit an kwarta, pinusil han mga suspetsado an magti-ayon ngan naigo hi Jeffrey hinungdan han iya kamatay.

Waray pa makuntento an mga suspetsado, pag gawas nira han tindahan ginpa-arakan pa hin bala an katawhan harani han tindahan. Dida hini, naigo hira Bernardita Capistrano, residente han Brgy Lapaan; Jomar Dumapit, taga Brgy Obo-ob; ngan usa nga 11 anyos nga bata.

An 46-anyos nga hi Bernardita in namatay tungod han mga igo hin bala ha iya lawas, samtang hira Dumapit ug an menor de edad in nadara ha hospital ngan nakatalwas.

Hapagkayana, nagpapadayon an kapulisan paglanat han mga suspetsado nga kadagmitan nangiskapo katapos han insidente.

Sobra hin usa ka oras antis nakagresponde an kapulisan tungod kay an lugar in harayo tikang ha City Proper ngan nakarawat nira an impormasyon alas 6:40 na. Ini in tungod kay naghihimakuri an signal han telepono didto han nasabi nga lugar. #