Nagin dako nga iristoryahon an pakalas nga pagbalhin ha iba nga assignment kan Police Major Joemen Collado, an hepe han Palo Municipal Police Office.

Temprano pa yana nga adlaw, Setyembre 14, nagkagawas an mga notisya nga ginlaknit hi Collado komo Chief of Police dara han sunod-sunod nga insidente hin panmatay dida han bungto nga iya nasasakupan.

Pero ginklaro ni LtCol Bella Rentuaya, tagyakan han PNP Regional Office, nga an mga insidente ha Palo deri amo an rason han re-assignment ni Collado. Nagsering hi Rentuaya nga duha na ka tuig hi Collado ha iya posisyon, sanglit umabot na an panahon nga igbabalhin na hiya ha iba nga katungdanan. An mga panhitabo ha Palo an iginkatuman la nga natapos na an Tour of Duty ni Collado dida han bungto.

Hi Collado in madedestino ha Operations and Management Division han Leyte PNP Provincial Office. An bag-o nga Palo Municipal PNP Chief amo hi Major Aldo Mendiola.

Kun manunumduman, ha sulod la hin usa ka bulan, magkasunod nga natabo ha Palo an panmatay hin gintatahapan nga may paghilambigit hin iligal nga droga.

Syahan nga pinanmatay an magtala-amay nga taga Jaro, Leyte. Hira Retired PNP member Pio Penaflor ug an iya anak nga hi Ylphie in pinanmusil ngan nagkamatay ha Palo samtang tikadto hira ha Drug Rehabilitation Center ha Dulag.

Dida han Sabado, upat ka tawo an gin-gamaan ngan pinanmatay ha Brgy Libertad, Palo. Duha han mga namatay in mga retirado nga pulis. Kaupod han mga biktima dida han sarakyan an usa ka tawo nga gintutudlok nga High Value Target tungod han droga.

Dida han nasabi nga duha nga insidente, an mga suspetsado in sakay hin mga SUV. Damo an nagtotoo nga may grupo denhi ha aton dapit nga nagpipinanmatay han mga indibiduwal nga nadadabi ha illegal drugs.#