Isumat.com/Oktubre 25, 2021

Usa nga drug den an napukan ngan kadam-an in nagka-aaresto dida hin sunod-sunod nga operasyon han mga otoridad kontra han iligal nga droga ha magkalainlain nga parte han rehiyon hadin nag-agi nga pira ka adlaw.

Hadton Oktubre 22 han gab-i, an mga kaapi han PDEA ngan Isabel, Leyte PNP in naghimo hin buy-bust operation ha Brgy Marvel han nasabi nga bungto. 11 katawo an nagka-aaresto dida han gintutudlok nga drug den ngan nakumpiskar in unom ka sachet hin gin-aalegar shabu, may kabug-aton nga 12 gramos balor 82 Mil pesos.

Nasikmit dida hini nga operasyon an gin-aalegar nga nagpapadalagan han drug den nga hira Mark Meramonte ngan Jeel Meramonte. Gindakop gihapon an mga bisita didto han mao nga lugar nga hira Giemel Ebatados, Bernard Toreja, John Paul Almadin, Mry Jane Espinisa, Jessa Mae Meramonte, Johnly Sarabia, Pidencio ESpinoza ngan duha nga menor-de-edad.

Hadto gihapon nga adlaw, an suspetsado nga hi Al Jones Sape in nadakop han kapulisan ha Brgy Tolingon, Isabel. Nakuha tikang ha iya in upat ka sachet hin gintotoohan nga shabu kantidad hin 2,300 pesos.

Hadton Oktubre 21, an 25-anyos nga hi Rex Paolo Loayon in na-aresto han operasyon nga gindumara ha Maasin City, Southern Leyte. Nakumpiskar tikang han gintatahapan in pito ka seachet hin gin-aalegar shabu ngan usa ka sachet hin ginpamara nga dahon hin marijuana. An iligal nga droga in kantidad hin 7 Mil pesos, sumala han mga otoridad.

Samtang, an mga kapulisan ha Tacloban City in nakadakop han suspetsado nga hi Gabriel Maraya hadton Oktubre 23. Narekupo tikang ha iya in lima ka sachet hin gintotoohan iligal nga droga kantidad hin 4,500 pesos, lakip na an buy-bust money, mountain bike ngan personal nga gamit.

An mga suspetsado in preso hapagkayana ngan nakatalaan umatubang han mga kaso nga iginsampa kontra ha ira. #