Isumat.com/7:45PM,June 26, 2020
Waray kamatuoran an mga nagsarang nga notisya ha social media nga deri nakarawat an Divine Word Hospital ha Tacloban han mga pasyente nga natapnan han COVID-19.
Ini an igindig-on han administrasyon han DWH komo reaksyon han mga iristorya ha social media nga sarado an hospital para han COVID Patients. Dida han ira opisyal nga pahayag nga ginpagawas yana nga kulop (Hunyo 26), nasunod hira han kamanduan han DOH nga an tanan nga Tertiary Hospitals han nasud in kinahanglan mag-admit han mga natapnan han virus.
Sumala han DWH, mayda nira andam nga mga kwarto o units nga para gudla ha mga pasyente han COVID, pero ira ginklaro nga kun mapuno na an ira bed capacity para hini nga mga pasyente, deri na nira maa-akos pagkarawat hin kadugangan pa nga mapa-confine. Ira gihapon ginsayod nga deri nira kakarawaton an mga COVID Patients nga mabalhin tikang ha iba nga hospital.
An DWH in nag-alotaga hin lugar ha ira Isolation Area para han Suspected, Probable ngan Confirmed COVID Patients.
Iginpasabot gihapon han hospital nga deri kinahanglan nga magpa-ilarum hin Rapid Anti Body Testing an mga Out-Patients nga mapakonsulta ha mga doktor didto han ira tagsatagsa nga klinika. Puede gihapon an Plain X-ray, 2D Echo ngan laboratory tests bisan waray Rapid Anti Body Test.
Pero kinahanglan an Rapid Test para han masunod: Ultrasound, Mammogram, Fluoroscopy, Dental Panoramic X-ray, CT Scan, MRI ngan Minor Surgeries.
Ginkikinahanglan naman an RT-PCR Laboratory Test para han Major Surgeries, Endoscopy ngan Tracheostomy.
Utro nga iginpatapod han DWH nga an ira mga facilidad ngan personales in talwas han COVID-19 kay ira ginsusunod hin tim-os an mga patakaran han DOH ngan World Health Organization. # (KEVIN SIOSANA)
