An Biktima han panmusil ha sulod han iya sarakyan. (Photo by The Calbayog Journal)

Isumat.com/9:00AM, Enero 21, 2021

Waray pa ngani katatapos an bulan han Enero 2021, nahipatik yana pala nga aga an ika-upat nga tawo nga pinusil ngan namatay ha Calbayog City.

Subay han impormasyon nga nahikay han Isumat.com, an biktima in hi Harry Rumohr, sumala han mga residente nga nakakakilala ha iya. Banda alas 7 yana nga aga, Enero 21, an biktima in pumakadto ha talipapa ha Brgy San Policarpo, porlomenos dos kilometros an kahirayo hini tikang ha City Proper.

Waray pa makakahaw-as ha iya Toyota Fortuner an biktima han tigda la nga pagpalibutan an iya sarakyan hin tulo ka tawo ngan ginpaarakan hin bala hi Rumohr. Subay pa han impormasyon, nababatasanan na han biktima an pamerkado dida hini nga talipapa.

Hadto nga takna, damo an nakakita kay damo an tawo didto han talipapa, pero waray gud mag-alang paghimo han krimen an mga suspetsado, pahayag pa han surok han impormasyon.

Nahisumat pa nga sumakay hin motorsiklo an mga suspetsado ha ira pag-eskapo.

Pag-entra han 2021, ini nga biktima an ika-upat nga pinusil ngan pinatay ha Calbayog. Ngatanan kalalakin-an ini nga upat ug an usa ha ira in 16-anyos pala an edad.

Tikang han 2018, hi Harry an ika-upat nga may apelyido nga Rumohr nga pinatay ha Calbayog. Hadton Pebrero 2018, hi Catherine Rumohr-Johnson in pinusil ngan namatay temprano pa han aga samtang nagbabaktas.

Hadton Abril 2019, hi Dr Vicky Rumohr in gintapo hin gunman ngan pinusil ngan namatay samtang nagmamaneho han iya pick-up ha Magsaysay Blvd, Calbayog.

Dida naman han Pebrero 2020, an negosyante ngahi Ann Rumohr-Dalen in pinatay hin duha nga suspetsado ha sulod mismo han iya tindahan ha Brgy East Awang han mao nga syudad.

An tulo nga kababayen-an nga biktima in nag-uukoy ha Rumuhr Compound ha Brgy Rawis, Calbayog. Sumala han mga nakakakilala ha ira, damo iton katunaan ngan mga propyedad han nasabi nga pamilya.

Han una nga tuig, nag-opreser pa ngani an pamilya hin premyo nga 3 Milyones Pesos han hin-o man nga makakaghatag hin impormasyon kasumpay han nagpapaluyo han mga panmatay. #