Pwede na gamiton an mga calamity funds han mga munisipyo ha probinsiya han Leyte kahuman nga mag deklara hin state of calamity an Sangunian Panlalawigan han Leyte mahitungod han padayon nga pag hinitaas han mga kaso hin Dengue ha bug-os nga probinsiya.

Sumala kan Dr. Lesmes Lumen an Provincial Health Officer han Leyte nga mahitungod nga an probinsya naman an nag deklara han state of calamity deri na kinahanglan nga mag deklara pa an mga munisipyo han probinsya agud la maka gamit han pundo para ha panahon hin mga kalamidad.

Guin dugang pa ni Dr. Lumen nga an pundo para han “quick response” in pwede gamiton para hin mga buruhaton agud mapugngan an pag damo han mga kaso hin dengue haira tagsa tagsa nga mga lugar.

An Provincial Health Office in nag padara na han ira mga health workers ha mga bungto nga hataas an kaso han Dengue agud suportahan an kampanya han gobyerno nga ma ipahibaro ha mga mulopyo han mga pamaagi agud malikyan an sakit nga dengue.

an mga bungto nga sakop han 1st ngan 2nd district han probinsiya an may pinaka damo nga kaso han Dengue sumala pa kan Dr. Lumen.

Dida han nag labay nga byernes durante han regular session han Sanggunian Panlalawigan, nagka urosa an mga miemro hini nga ipailarom ha State of Calamity an probinsiya han Leyte agud makahimo hin kaangayan nga mga pitad nga gagamiton an calamity funds han mga municipyo nga na sasakupan hini pag poypoy han mga kaso han Dengue.