Isumat.com/6:19AM, December 9, 2020
Gintitimangno na yana han mga personales han Basey District Hospital (BDH) an usa nga baby nga ginlabog han iya nanay ha Brgy Amandayehan, Basey Samar.
Sumala han impormasyon tikang ha Samar Police Provincial Office, hadin nakalabay nga adlaw, natad-an han mga residente an baby didto hin masighot nga parte han lugar an baby ngan tumawag hira dayon han Rescue Unit ngan kadagmitan gindara an baby ha hospital.
Dida han imbestigasyon, menor de edad an iroy han baby. Nagburod an nanay tungod kay ginlugos hiya. Iya daw adto nabuhat nga igsalikway an iya anak tungod kay nahahahdlok hiya nga masisina an iya kag-anak han nahitabo ha iya. An nanay han baby in nag-uukoy dida han mao nga barangay.
Ha iba naman nga panhitabo ha Basey, namatay an suspetsado hin panikas nga hi Arvin Baculanlan han makigpusilay hiya han mga otoridad nga ma-aresto ha iya ha Brgy Tingib.
An korte in nagpalusad hin Warrant of Arrest kontra kan Baculanlan ha kaso nga Robbery with Intimidation kun diin may piyansa unta hini nga 100 Mil pesos.
Han maka-abat an suspetsado nga mayda madakop ha iya, nagpabuto hiya kontra han kapulisan pero naigo hiya han bumulos pagpabuto an mga tinubyanan han balaud. Natabo ini han Disyembre 8, pasado alas 2 han maagahon. #
