(File photo by Sun Star)

Isumat.com/3:12PM, May 26, 2020

Ginklaro ni Mayor Richard Gomez han Ormoc City nga deri hiya nariwa han gin-implementar nga Balik-Probinsya Program han Duterte Administration. Ini an iya igindig-on katapos la niya magpahayag nga diskuntento hiya han koordinasyon han mga ahensya han gobyerno ha pagpatuman han programa.

Hadin nakalabay nga adlaw, waray gud magruhaduha hi Gomez nga magpahayag nga deri hiya naa-asyahan han bagabaga paturapak la nga pagpa-uli han mga mulopyo nga na-stranded ha Manila sugad man han mga OFWs nga tibalik na ha ira tagsatagsa nga probinsya.

An amay han Ormoc in nagsering nga angay unta maghatag an National Inter-Agency Task Force ngadto han natutungdan nga mga LGUs han kaangayan nga mga impormasyon pira ka adlaw antis an pagpabalik han apektado nga mga residente basi maseguro nga nag-uukoy gud hira didto han LGU ngan maka-andam an LGU han pagtapo han mga magkakabalik.

Kun aton manunumduman, duha ka adlaw nga waray maka-uli dayon an tulo nga taga Ormoc ha ilarum han Balik-Probinsya ngan nag-istambay la anay ha Palo, Leyte kay waray hira kuhaa han LGU-Ormoc. Kakulop, tigda la liwat nga umabot an text kan Gomez tikang ha DILG nga may mga Ormocanon nga OFWs an maabot ha Tacloban Airport.

Dida han duha nga insidente, pirmi nalalangan an pagpasabot kan Gomez nga may mga taga Ormoc nga kaapi han mga grupo nga magkakabalik tikang ha Manila. Ginsusnan han alkalde an deri hapsay nga koordinasyon han mga ahensya han gobyerno.

Sumala ha iya, deri la ini ordinaryo nga pagbalik hin mga residente tungod han COVID-19 pandemic. Kinahanglan istrikto nga igpatuman an health protocols basi maseguro nga waray makakalusot nga tawo nga nagdadara han virus.

Sering pa man niya, kawang la an sobra duha ka bulan nga panlimbasog nga magin COVID-free an iya syudad kun amo ini an bubuhaton nga palayapay an pagsunod han guidelines.

Pero gintagan hin duon han opisyal nga syento porsyento nga suportado niya an programa ngan ginhihingyap niya nga magin malinangpuson ini.

An Ormoc City in nag-andam hin porlomenos 300 nga housing units komo Isolation ngan Quarantine Faciilities para han mga magkakabalik nga residente.

Ha masunod nga duha ka bulan, nakatalaan umabot ha Pilipinas in sobra 40 mil nga OFWs, labot la han mga residente nga na-stranded ha Manila nga karuyag na gihapon maka-uli ha ira tagsatagsa nga lugar.

Iginpatapod han OWWA nga an mga OFWs in tutugutan pag-uli ha ira mga lugar kun tapos na an swab testing ngan negatibo an resulta, samtang an mga na-stranded ha Manila in pababalikon kun waray sintomas han sakit ug an swab testing in hihimo-on pag-abot nira ha ira mga probinsya. # (KEVIN SIOSANA)