(Image by noypigeeks.com)

Isumat.com/8:52AM, June 5, 2020

Usa ka semana tikang yana, ma-arangkada na liwat an Balik-Probinsya nga programa han gobyerno ug an probinsya han Leyte in nangangandaman na liwat pagkarawat han mga Leyteno nga magkakabalik.

Kakulop, hi National Housing Authority General Manager Marcelino Escalada in nag-anunsyo nga dida hiton Hunyo 11, 2020, an sunod nga batch han Balik-Probinsya in mangunguli ha probinsya han Leyte.

Hi Escalada nga amo gihapon an Executive Director hini nga programa, in nagsering nga dida hito nga petsa malakat in usa ka gatos nga Leyteno tikang ha Manila ngan nakatalaan umabot denhi ha probinsya pagkasunod nga adlaw.

Ini nga programa nga nanunuyo nga maka-uli an mga na-stranded nga katawhan dara han lockdown ngan pag-iban han duro kadamo nga popolasyon ha Manila in ginsusnan hin damo nga sektor dara han alagid-agid nga paturapak nga implementasyon han syahan nga batch.

Kun aton manunumduman, waray klaro nga koordinasyon an nahitabo ha mga LGUs sanglit an iba nga munsipyo in deri ngani maaram nga mangunguli an ira mga residente. Ini in labot la han mga nagkabalik nga positibo han corona virus nga nagdurot hin pagkabara ha mga bungtuhanon. Dara hini nga mga reklamo ngan aberya, temporaryo nga ginpahunong an programa.

Ini nga pagka-abot han mga na-stranded ngan karuyag na umuli ha Leyte in labot ha han mga Returning OFWs, kay haros kada adlaw nagpapadayon an pagka-abot han mga OFWs pinaagi han mga eroplano nga natugpa ha Tacloban DZR Airport.

Ha luyo nga bahin, hi Palo, Leyte Mayor Ann Petilla in nagsumat nga maabot hin 10 mil nga mga Leyteno an nagparehistro ha ilarum hini nga programa ngan ginlalauman nga maghihinay-hinay na hira pagkabalik ha probinsya ha masunod nga mga bulan.

Hi Petilla nga amo gihapon an Presidente han League of Municipalities-Leyte Chapter, an nagpahayag pa nga naghimo na hin mga pitad an mga natutungdan nga ahensya han gobyerno basi kalikyan na an deri matulanoy nga proseso nga nahitabo durante han pagpa-uli han syahan nga batch.

An Probinsya han Leyte an gintudlok nga “Pilot Area” hini nga programa han National Government nga iginduso ni Senador Bong Go. # (KEVIN SIOSANA)