(Photos by Borongan City Information Office)

Isumat.com/Agosto 04, 2022

Tatalinguha-on han LGU-Borongan City ug han kontraktor han airport nga makumpleto an mga rekisitos ngan iba pa nga mga gin-aaro han Philippine Airlines (PAL) basi magkaada na hin commercial flights an nasabi nga airline company ngadto han syudad ha deri maiha nga panahon.

Ha pahayag han Borongan City Information Office, pira nga mga opisyales han PAL upod an ira Technical Team in nagdumara hin inspection ngan evaluation han mga facilidadis han airport hadin Agosto 1-3, 2022.

Panuyo han nasabi nga aktibidad an pag-istudyo ngan pagseguro nga magigin hapsay an operasyon han airport ug an magigin ganansya han airline company kun magkaada hin commercial flights han ruta nga Manila-Borongan-Manila.

Sumala han pahayag han LGU, ini in dako nga pitad ha paningkamot han syudad nga magin konektado ha mga dagko nga syudad ha Pilipinas.

Hi City Mayor Jose Ivan Dayan Agda in malina-umon nga nagsumat nga an pagbisita han mga tinaglawas han PAL ngadto han airport in dako nga senyales nga intresado an kompaniya para han commercial flightd ngadto han syudad.

Hapagkayana, paghuhulaton pa an opisyal nga report han PAL Technical Team mahitungod han ira evaluation han airport, ngan dako an paglaum han LGU nga magigin paborable an aksyon han PAL han hangyo han syudad nga magkaada na hin commercial flights.

Kun matabo ini, an PAL Jet amo an mabiyahe han mao nga ruta, pahayag pa han report.

Dida pa hiton Pebrero 2023 an target nga matapos an paghimo han extension han Runway-2 han airport, pero nagsering an kontraktor nga bubuhaton nira an ngatanan basi materu-temprano pa an katapos hini basi puede na magamit an airport antis matapos an tuig 2022.

Iginpahayag pa ni Agda nga magdadalan ini nga operasyon han airport hin pagpalangbo han ekomoiya deri la han Borongan kundi upod an probinsya. # (with additional report from Alicia Nicart)