Isumat.com/8:11AM, Marso 16, 2021
Nagpapadayon an pagkalusad tikang ha bukid ngan pagbalik ha piyod han balaud an mga miembro han kumunista nga kagi-usan denhi ha Rehiyon Otso.
Hadin nakalabay nga adlaw, duha nga miembro han Sub-Regional Committee Emporium han New Peoples Army – Eastern Visayas an sumurender ngadto ha PNP Regional Mobile Group ha Lavezares, Northern Samar.
Ginkilala han mga otoridad an sumurender nga hira alias Titum ngan alias Angie, ngaduha residente han Catarman, Northern Samar. Ira gihapon igintubyan ha mga kapulisan in usa nga kalibre 45 nga pistola, usa nga magazine ngan tulo nga bala.
An duha nga anay kaapi han CPP-NPA in makakatagamtam han mga benefecio ha ilarum han E-Clip Program han gobyerno.
Samtang, tulo nga suspetsado ha paghilambigit hin iligal nga pangutod hin kahoy an nasikmit han mga otoridad ha San Isidro, N. Samar hadin Marso 13, 2021.
An mga kahoy in waray kaangayan nga mga papeles ug nagkakantidad hin 117 Mil pesos. Nasakban han mga kapulisan an mga suspetsado nga nagkakarga han kahoy ha usa nga sarakyan pandagat ngan igbibiyahe ngadto ha Bicol.
Dida naman han Marso 14, balor hin 79 Mil pesos nga illegal lumber an narekupo ha pantalan han Allen. Sumala han mga kapulisan, luran hin trak tikang ha Tacloban an mga kahoy nga waray dokumento ngan dadad-on unta ngadto ha Lucena City.
An mga indibiduwal nga nagkadadakop in sasampaan han kaangayan nga mga kaso. #
