Isumat.com/Marso 16, 2022
Usa nga grupo hin armado nga mga kalalakin-an an iginka-enkwentro kontra han mga tropa han gobyerno ha Jiabong, Samar hadin nag-agi nga adlaw kun diin naigo hin bala an duha han mga suspetsado.
Dida han inisyal nga report nga nakadangat ha Isumat.com, an Jiabong PNP Office in nakakarawat hin impormasyon nga mayda armado nga kalalakin-an didto ha Brgy Alejandria han nasabi nga bungto.
An kapulisan in nakigsumpayan ha 87 Infantry Battalion han Philippine Army, sanglit magka-upod an PNP ngan mga sundalo pagkadto han lugar.
Sumala pa han report, pag-abot gud la han mga tropa han gobyerno ha Brgy Alejandria, ginpabuthan dayon hira han waray panhikilal-i nga mga suspetsado.
Dida hini, nagkaada na hin pinusilay kun diin nag-antos hin igo hin bala an duha han mga suspetsado. Kumalagiw an upat han mga gintatahapan ngan ginbayaan an ira mga kaupdanan nga samaran.
Nadakop han mga otoridad an duha nga samaran ngan gindara ha hospital basi pagtambalon.
Hapagkayana, ginhihimo pa an imbestigasyon ngan waray pa opisyal nga pahayag an mga otoridad han pangilal-an ngan kun ano nga grupo kaapi an mga suspetsado. #
