Isumat.com/3:11PM, June 8, 2020

Nagpapabilin nga deri ginpapagawas ha ira kabablayan an mga residente hin duha nga barangay ha Naval, Biliran tungod han igin-imposar nga lockdown.

An mga barangay han Caraycaray ngan PS Eamiguel an iginbutang ha lockdown para han gindudumara nga contact tracing. Nasabutan han mga otoridad nga may tag-usa nga residente han duha nga barangay nga iginka-irignom han passenger van driver nga taga Leyte, Leyte nga nag positibo han corona virus.

An nasabi nga driver in gintotoohan nga natapnan han 19-anyos nga taga Naval nga umuli tikang ha Baguio City hadin Mayo 27, 2020. Ini nga mga Positive Cases an syahan nga panhitabo ha mga bungto han Leyte ngan Naval.

Dara hiini, an LGU-Naval in nagpapadayon panhatag hin hinabang han apektado nga mga residente han lockdown. Kanina han aga, an kada pamilya in gintagan hin tag napulo ka kilo hin bugas.

An LGU in naghangyo ha mga residente nga maghatag hin hul-os nga kooperasyon hini nga contact tracing basi maseguro nga matutudlok gud an mga tawo nga iginka-urusa hini nga nagkaharampang hin tagay.

Kakulop, utro nanawagan hi Biliran Governor Rogelio Espina para han ira mga kababayan nga karuyag bumalik ha ira probinsya nga makigsumpayan gud ha ira basi masunod an iginplastar nga proseso ha panuyo nga deri na maglarab an ginkakahadlukan nga virus. # (KEVIN SIOSANA)