Isumat.com/9:46AM,May 19, 2020
Sobra hin 11 Mil nga kabablayan ha Eastern ngan Northern Samar an nagkaruruba dara han pagdagmal ni bagyo Ambo hadin Huebes, Mayo 14.
Tikang han inisyal nga report nga 2 Mil nga naruba hadton Sabado, umabot na ini yana hin 11,414 nga nagkawawakay nga kabablayan. Ini in subay han impormasyon tikang ha PNP Regional Office.
Ha lalawigan han Eastern Samar, 9,289 an nadanyos nga balay. 2,955 ha Can-Avid, 2,611 ha Oras, 2,062 ha San Policarpo, 674 ha Arteche ngan 394 ha Taft. Waray pa denhi mahi-upod an mga nadistroso ha Jipapad ngan Maslog sugad man ha Sulat.
Sobra hin 34 Mil ka pamilya an apektado han bagyo ha Eastern Samar.
Didto naman ha Northern Samar, 740 nga kabablayan ha Allen an naruba, 200 ha Lope De Vega, 50 ha Bobon, 150 ha Laoang, 24 ha San Antonio ngan 219 ha Lavezares. An distroso ha Catubig, Gamay, Mapanas ngan Lapinig in deri pa lakip hini nga record.
Kasumpay hini, igindeklarar na han Eastern Samar an nasabi nga siyam nga bungto nga aada ha ilarum han State of Calamity. Dara hini nga deklarasyon, an Provincial Government in puede makagamit han ira Calamity Fund para han paghatag hin hinabang ngan rehabilitasyon han apektado nga mga bungto.
Ginbabanabana nga sobra hin 900 Milyones Pesos an kantidad han danyos ha agrikultura ngan haros 60 Milyones an distroso ha infrastraktura han nasabi nga mga municipalidad.
An mga alkalde han LGUs in nanawagan na ha National Government hin kadagmitan nga pagpadangat hin ayuda ngadto han ira mga residente. Partikular nga ira gin-aaro an pagkaon, tubig, medesina ngan mga construction materials.
An DSWD-Regional Office in nag report kakulop nga maabot na yana ha Eastern Visayas in porlomenos 40 Mil nga Family Food Packs para han duha nga probinsya. # (KEVIN SIOSANA)
