Isumat.com/7:15AM, November 24, 2020
Namatay in usa nga babaye ngan nagkasasamad in upat pa nga iba dida hin magkalain nga insidente hin panmusil ha Ormoc ngan Calbayog hadin nag-agi nga duha ka adlaw.
Hadin Nobyembre 21, ginpa-arakan hin bala an tulo ka tawo ha Brgy Mabini, Ormoc City kun diin naawat an kinabuhi ni Rizalina Canete, 29-anyos. Naigo gihapon hin bala hira Redford Judilla, 31-anyos ug hi Ma Theresa Teves, 37-anyos, dida han mao nga panhitabo. Nakatalwas hira Judilla ngan Teves ngan gintatambal yana ha hospital.
Dida han inisyal nga imbestigasyon, an mga biktima in nagluluto han ira pagkaon han tigda la umulpot an waray hikilal-i nga suspetsado ngan ginpanmumusil an mga biktima.
Samtang, kritikal yana an kahimtang ha hospital hin duha nga kalalakin-an nga pinanmusil ha Brgy Central , Calbayog City kakulop.
An mga biktima in ginkilala nga hira Neil Ilagan, 48 anyos ngan residente han mao nga barangay; ngan hi Norberto Medina, 45-anyos, taga Brgy Dagum, Calbayog. An duha in na-istambay la ha gawas hin usa nga tindahan han umagi an suspetsado ngan panmusilon hira.
Kadagmitan gindara ha hospital an mga biktima kun diin nahisumat nga aada ha kritikal nga sitwasyon.
An mga otoridad in nagpapadayon pag-imbestigar han duha nga panhitabo basi makilal-an an mga suspetsado ngan matudlok an motibo.#
