Isumat.com/Agosto 31, 2022
Waray kamatuoran ngan gin-imbento la hin usa nga estudyante nga taga Cabucgayan, Biliran an nagsarang ha social media nga ginkidnap hiya kun diin nahidabi na liwat an “white van.”
An Biliran Provincial Police ngan Naval Municipal Police Office in nagdumara hin press conference yana nga adlaw, Agosto 31, 2022 basi mahipasamwak kun ano an tinood nga panhitabo han gin-alegar hin usa nga babaye nga estudyante nga ginkidnap daw hiya hadton Agosto 20, 2022.
Kun manunumduman, usa nga concerned citizen an nakabati nga nag-iistorya ini nga babaye ngadto han iya kaupod nga biktima daw hiya hin kidnapping. Iginreport han nakabati ngadto ha Naval Police an insidente ngan ginkadto han kapulisan an babaye ngan ginkumbida ha Police Office basi maghatag hin kasayuran.
Igin-alegar han estudyante nga pasado ala 1 han kulop hadto nga petsa, sumakay hiya hin traysikol nga kolor yellow nga waray plate number kay tikadto hiya ha DSWD tikang han iya boarding house ha Naval. Ini in agud mag-areglar han programa han DSWD mahitungid han educational assistance.
Pero waray hiya igdul-ong ngadto han destinasyon, lugod gintarhog hiya han drayber pinaagi hin pagtutok hin pisaw ngan pusil ngan gindara hiya hin deri tawuhon nga lugar ha Brgy Agpangi. Ginhigtan an iya till ngan kamot ngan iginbilin hiya ha traysikol ngan tumabok ha kalsada an drayber ngadto han busag nga van kun diin iya iginka-istorya in tulo ka tawo nga nagpaka-bonnet, sumala han estudyante.
Han nag-iiristorya an mga kalalakin-an didto sapit han white van, nakahimo an babaye nga makuha an gunting ha iya bag sanglit iya nautod an gapos ha iya ngan nakadalagan hiya.
Ini nga mga pahayag han estudyante an igin-record han mga pulis ngan nagtikang liwat hira han imbestigasyon. Denhi na gumawas nga nagkaka-irimpati an istorya han babaye ug an mga testigo ngan CCTV Footage.
Pagkagab-i hadto nga petsa, igin-post pa han estudyante ha ira GroupChat ha facebook an nahitabo nga kidnapping ha iya.
Ha imbestigasyon han kapulisan, waray nakit-an nga yellow tricycle nga umagi hadto nga takna dida han mga kalsada nga amo daw an gin-agi-an. Waray gihapon nakita nga tricycle ngan white van an mga tawo nga nangungukoy harani han lugar nga gindad-an ha iya. Waray gihapon marka han mga kaliding hin tricycle ngan van didto han lugar. Waray gihapon ha CCTV ngan waray nakakita nga nagdalagan an babaye.
Dida mismo han petsa nga amo an panhitabo, waray nakita nga mga marka hin higot ha kamot ngan till an kapulisan ngan waray tigaman ha pamahongpahong han babaye nga naka-eksperiensya hiya hin makangingirhat nga sitwasyon.
Han utro nga pagkumbida han kapulisan han babaye ngadto ha Naval Police Office, waray na makaglikay pa an babaye han pagsumatan hiya han mga imbestigador han ira nadiskubre dida han imbestigasyon. Aminado an babaye nga naghimo-himo hiya hin istorya basi makuha an atensyon han iya ate nga bumalik na ha ira balay. An iya magurang nga bugto in lumakat ha ira balay ngan karuyag niya nga bumalik sanglit nag-imbento hiya hin insidente.
An estudyante in naghimo na hin public apology ha Mayors Office han Naval. Ini nga panhitabo in nagdurot hin kabaraka ha bug-os nga probinsya han Biliran ngan iba pa nga lugar.
Iginpahayag han Naval PNP nga may natalapas nga probisyones han balaud kasumpay han pagpasarang hin peke nga impormasyon an estudyante, sanglit yana ira gin-aandam an kaangayan nga kaso nga igsasalawad kontra han babaye.
Nagsagdon an kapulisan ha publiko nga deri gud maghimohimo ngan magpasarang hin peke nga mga balita kay nakakahadlok ini ha publiko ug an mapapamatud-an nga naghimo hini in may baratunon ha balaud nga may sirot nga kapresuhan ngan multa. # (Report taken from Biliran Island News Video)
