Photo by Samar Provl Government)

Isumat.com/8:43AM, October 31, 2020

Igindederi na an pag-nginaab ha mikropono han mga videoke ngan karaoke ha probinsya han Samar.

Gin-aprobaran han Sangguniang Panlalawigan an ordinansa numero 16-265-20 nga tinatawag “An Ordinance Prohibiting the Use and Operation of Videoke, Karaoke, and other similar sound producing Devices.”

Subay han balaud, waray magbi-videoke tikang alas 5 hit aga tobtob alas 10 hit gab-i, Lunes tobtob Sabado ha bisan diin nga lugar han lalawigan. Panuyo hini nga pitad nga deri ma-istorbo an mga estudyante nga adto nag-aaram ha ira mga panimalay pinaagi han Distance ngan Modular Learning.

Nagsering hi Samar Governor Reynolds Michael Tan nga deri mag-alang pag-reklamo an publiko ngadto ha kapulisan ngan mga opisyal han barangay kun mayda natalapas hini nga kamanduan.

An makakasupak in mumultahan hin Mil Pesos ha syahan nga pakasala, Dos mil ha 2nd offense ngan Tres Mil ha 3rd offense. #