Usa nga residential/commercial structure an na-ugbaw ngan na-alakbatan gihapon an sapit hini nga boarding house dida han natabo nga sunog kanina han maagahon ha Burgos St, Tacloban City.

Subay han inisyal nga imbestigasyon han Bureau of Fire Protection-Tacloban, alas 3:43 han maagahon han makakarawat hira han fire call ngan kadagmitan nira ini nga ginrespondehan. Igindeklarar han mga bumbero nga fire-out an kalayo paghagos la hin porlomenos 25 minutos.

Nagpapakita an panguna nga imbestigasyon nga dida han carenderia nagtikang an kalayo ngan posible faulty electrical connection an hinungdan hini. Tobtob nga ginsusurat ini nga notisya, waray pa iginhatag nga kantidad han danyos han mga propyedad nga nasunog an mga fire investigators.

Naugbaw han kalayo an usa nga estraktura nga hinimo-an hin light materials. Usa ini nga carenderia/silogan ug usahay nagbabaligya pa hin banana que. Nakatalwas naman an mga nag-uukoy dida han nasabi nga establisemento. Waray liwat nahisumat nga nag-antos hin karamtan ha lawas dida han insidente.

An sapit nga Mena’s Boarding house in naalakbatan pero deri duro an danyos hini. An insakto nga lokasyon han nasunogan amo in ha kahilab-an han Burgos St. butnga han eskina Paterno ngan eskina Juan Luna nga mga kalsada.

Sapit ini hin bag-o pala nga gin-abrihan nga Pension House pero an nasabi nga establisemento in waray madarahigi han kalayo. #

(Posted 7:15 AM, April 5, 2020)