Mahibabalik na ba an Tacloban City han hadto anay pagkilala han syudad komo usa han mga sports powerhouse ha Rehiyon Otso?

     Ini an dako nga paki-ana nga gin-aambisyon han Team Tacloban nga magin positibo an kabatunan dida han pagbubuhaton nga Eastern Visayas Regional Athletic Association (EVRAA) 2020 Games yana nga bulan ha Burauen, Leyte.

     Hadin naglabay nga pira na ka tuig, diri gud nakakahimo an Tacloban Red Stallions nga mahilakip ha Top 3 dida han EVRAA, tarihas han una nga mga panahon nga aadto gud pirmi ha igbaw han standings an syudad. Dida han 2019 nga murumlay nga gindumara ha Ormoc City, nakahimo la an Red Stallions nga makatugpa ha ika-walo nga pwesto dida han trese nga nga teams nga nagpa isan-isan.

     Dida han 2019 rankings, nakaplagan han Team Tacloban in 13 nga gold,  23 nga silver ngan 36 nga bronze medals sanglit harayo gud hira han mga nanguna nga mga teams kun diin an Ormoc an nagin kampeon.

     Pero yana nga tuig, gin tatarget han Team Tacloban nga makatugpa ha top 3 ngan pinaagi ini han paningkamot han DepED City Division ha panguna ni Supt. Mariza Magan. Subay han nakuha nga impormasyon han Isumat.com tikang kan City DepED Sports Coordinator Delilah Delos Santos, ginbuhat nira yana an ngatanan nga paningkamot ha training labi na an mga players ha elementary division kun diin duha la nga gold medal an ira nadag-an hadton 2019.

     Dako an paglaum han City DepEd nga pinaagi han liderato ni Magan nga usa nga sports enthusiast, magtitika-igbaw  an performance han Team Tacloban ha EVRAA.  Han 2019 EVRAA, hi Magan pa hadto an mangulo han Samar Division ug hira an naka-angkon han ika tulo nga pwesto. Kataliwan hadto, hiya in nabalhin ha Tacloban City sanglit aada yana ini nga makusog nga pagduso han ira panlimbasog.

     An Red Stallions in naglalaum nga makakaghakot hira hin medalya ha larangan han swimming, athletics, taekwondo, volleyball ngan badminton. Ginkokomponer an delegasyon hin 469 nga atleta, ngan sobra usa ka gatos nga officials ngan coaches. Pamumunuan an grupo nira Mayor Alfred Romualdez ngan Supt. Magan. An syudad han Tacloban in nag-alutaga hin 9.3 million pesos samtang an City DepEd in may counterpart nga 200 thousand pesos para han kanan Team Tacloban partisipasyon hini nga murumlay.  

     An EVRAA games amo an gidadaku-i nga sporting event ha rehiyon kun diin magkaka-aratbang an mga magmurulay ha elementarya ngan high school tikang han trese nga dibisyon han DepED han Sinirangan Visayas.      An syudad han Ormoc amo an back-to-back defending champion han EVRAA. #