Isumat.com/3:45PM,April 28, 2020

Imbes nga matatapos na an Enhanced Community Quarantine ha Tacloban yana nga adlaw Abril 28, ginpahilawig pa ini hin duha ka adlaw ngan tobtob na ini han Abril 30; ug an General Commmunity Quarantine (GCQ) an igpapatuman tinikangan Mayo 1 tobtob Mayo 15, 2020.

Ini an iginpasamwak ni Mayor Alfred Romualdez dida han press conference yana nga kulop. Sumala kan Romualdez, kun ano an igindederi ngan igintutugot han ECQ igpapadayon ini tobtob Abril 30. An mga pagbag-o han mga guidelines in magtitikang naman ha Mayo 1.

Pero igindig-on han alkalde nga bisan pa magin GCQ na dida hiton Mayo, magpapadayon an duro ka istrikto nga pagbantay han mga borders han Tacloban labi na ha San Juanico Bridge nga amo an pagsulod tikang ha Samar ug an boundary ha parte naman han pagsulod tikang han iba nga parte han Leyte.

Igpapadayon gihapon an istrikto nga pagpatuman han social distancing ngan pagsul-ot han face mask bisan pa umabot na iton Mayo.

Ha ilarum han GCQ gintutugutan an masunod: operasyon han restaurants basta take-out la ngan drive-thru, operasyon han mga barbero ngan salon, pag-abri han mga negosyo pero kun mahihimo minimal workforce la ngan deri angay magtrabaho an nagpapakita hin sintomas hin sakit, puede na gihapon abrihan an mga National Government Offices kun karuyag na han ahensya, puede na magbaligya, pumalit ngan magdara hin makahurubog nga irimnon pero deri puede mag-inom ha pampubliko nga lugar.

Mahugot naman nga igindederi an bulang o tupada, bisan ano nga klase hin huego, sinehan, internet shop, nightclub, beerhouses, bars, public swimming pools, public beaches, massage parlos, mga pa-ugnat ha kusog sugad han basketbol ngan iba pa ug pagmulay ha playgrounds ngan plaza. Deri liwat puede an mga katitirok hin mga organisasyon ug mga travel and tour activities.

Ha ilarum gihapon han GCQ, deri pa tutugutan an pampubliko nga mga sarakyan tikang ha gawas nga makasulod ha Tacloban, pero pag-iistudyuhan han City Government an hinay-hinay nga pag-abri han public transport tikang ha gawas han syudad.

Magpapadayon naman an mga byahe han mga sarakyan pampubliko ha sulod han Tacloban basta deri la ini pupun-on hin pasahero.

Igrerekomendar naman han City Government ngadto ha mga eskwelahan nga igpadayon an suspension han klase, pero kun magdesisyon an Deped o CHED hin pag-abri han eskwela , masugot an City Government hini.

An mga katawhan nga tikang ha iba nga bungto o syudad in deri la gihapon makakasulod ha Tacloban labot la kun mga magtatrabaho hira ha gobyerno o pribado nga sektor ngan kumpleto hin dokumento ug aanhi ha Tacloban an ira trabaho. Tutugutan pagsulod ha syudad an mga frontliners kun tikang ha iba nga bungto sugad man mga tawo nga aada ha emergency nga sitwasyon.

Ha ilarum han GCQ, igindederi gihapon pagsinudoy-sudoy ha gawas han balay an mga tawo nga nag-eedad 20 anyos tipa-ubos ug mga senior citizens, mga burod ngan may sakit.

An mga contractors hin mga proyekto ug an ira magtatrabaho in tutugutan na gihapon pagsulod basi igpadayon an nahunong nga mga proyekto.

Han Mayo 1, bubulkason na gihapon an mga barangay controlpoint basi makapahuway na an mga opisyal ngan volunteers han barangay. Pero kun may mga sitwasyon nga kinahanglan igpadayon an monitoring ha usa nga barangay, igpapadayon an pagbantay.

Makakagawas na gihapon bisan waray quarantine pass basta importante an panginahanglan. Hinayhinay gihapon nga tutugutan an mga vendors ug iba pa nga nagpapakabuhi.

Mahugot naman nga iginmando ni Romualdez ngadto ha publiko nga kun mayda tawo o paryente nga makalusot ngan umabot ha ira tagsatagsa nga balay, dayon ini ig report ha City Hall basi mabantayan ini. An deri magsusunod hini in papasakaan hin kaangayan nga kaso.

Nanawagan gihapon an alkalde nga deri tumagya an publiko ngan deri liwat man-ngimas tungod kay GCQ na an igpapatuman pag-abot han Mayo 1. Iya iginpahinumdom nga delikado ini nga sakit ngan puede ini bumutho ha bisan ano nga oras ha Tacloban kun deri mag-iikmat an mga tawo. Bisan pa kun igpatuman na an GCQ, dapat naka face mask la gihapon kun magawas han balay kay may multa an deri masunod hini subay han iginpasa nga ordinansa.

An GCQ in igpapasunod tikang Mayo 1 tobtob Mayo 15, pero an gobyerno in puede magpatuman hin mga adjustments o pagbag-o han sistema samtang gintitirutimbang an sitwasyon. #