Isumat.com/3:58PM, June 16, 2020

Deri na kinahanglan nga magtindog pa hin kadugangan nga Isolation/Quarantine Buildings an syudad han Tacloban. Ini an nagin pahayag ni Mayor Alfred Romualdez han iya pakig-istorya ha mga kaapi han media yana nga adlaw.

Nagsering hi Romualdez nga kun magtutukod hin bag-o nga mga istraktura, mahagos pa ini hin porlomenos unom ka bulan antis matapos ngan mag giginastuson pa an gobyerno hin 50 milyones pesos. Igindugang pa niya nga ini nga mga building in deri man liwat magagamitan pag-abot han takna nga waray na pandemya.

Hapagkayana, mayda duha nga istraktura nga gin-convert han City Government nga magin Isolation/Quarantine Facilities, pero deri na ini dudugangan pa, pahayag ni Romualdez.

Iya ginklaro nga kun magtikadamo pa an mga tawo nga ig-aakomodar hini nga facilidadis, mag rerenta nala an City Government hin mga hotels. Pinaagi hini, makakabulig pa an syudad han mga Hotel operators ug mga magtatrabaho. Sering pa han alkalde, damo an hotels ngan pension houses ha Tacloban nga puede gamiton ingkaso madugangan pa an mga pasyente han COVID-19.

Hapagkayana, an City Government in nag-rerenta hin duha nga hotels nga amo an quarters han mga health personnel.

Nagpahayag gihapon hi Romualdez nga andam an Tacloban pagkarawat han mga mangunguli tikang ha iba nga lugar, an importante la makigsumpayan ha mga personales han gobyerno hin temprano basi magin hapsay an proseso han pag-abot ngan pag-monitor ha ira.

Utro nanawagan an alkalde ha mga Taclobanon nga hingpit gud nga sundon an mga health protocols sugad han insakto nga pagsul-ot han face mask ngan social distancing kay napamatud-an na ini nga epiktibo nga paagi basi makalikay han virus.

Sobra na hin 400 an mga naka-uli nga Returning Residents han Tacloban kun diin 234 an aada ha Home Quarantine ngan sobra 50 katawo an aadto ha Quarantine Facility. Dida han lima ka tawo nga nag positibo han virus nga taga Tacloban, usa na hini an naka-recover, samtang an upat in aadto pa ha hospital ngan maupay an ira panlawas. #